پاۆلودار وبلىسىندا تۇنگى ۋاقىتتا تىنىشتىقتى بۇزعان 6244 فاكتى تىركەلگەن. بۇل 2025 جىلدىڭ باسىنان بەرگى كورسەتكىش. ايقاي-شۋ شىعارعان تۇرعىنداردىڭ بارلىعى جاۋاپكەرشىلىككە تارتىلعان, دەپ جازادى Egemen.kz.
وتكەن ءتۇنى پاۆلوداردا بىرنەشە وقيعا تىركەلدى. تۇنگى ساعات 03:54-تە كوپقاباتتى ءۇي تۇرعىنىنان پوليتسياعا حابار تۇسكەن. ول كورشى پاتەردە مۋزىكا قاتتى ويناپ جاتقانىن جەتكىزگەن. دەرەۋ جەتكەن پوليتسەيلەر ميكروفونمەن ءان ايتىلىپ جاتقان تۋعان كۇن وتىرىسىن انىقتاعان.
وسىعان ۇقساس شاعىممەن تاعى ءبىر تۇرعىن جۇگىنگەن. ونىڭ ايتۋىنشا, كورشى تۇراتىن كوپبالالى وتباسىندا ىشىمدىك ىشىلەدى, ۇرىس-كەرىس سوزدەرى قاتتى ەستىلىپ جاتادى, ال كورشىلەردىڭ ءتارتىپ ساقتاۋعا شاقىرعان ەسكەرتۋلەرىنە قۇلاق اسپايدى. سول كورشىلەر تىنىشتىقتى ءجيى بۇزۋ ارقىلى بالالاردىڭ ۇيقىسىن بۇزىپ, مەكتەپتەگى ۇلگەرىمىنە زيان تيگىزىپ ءجۇر.
وسى رەتتە پوليتسەيلەر كورشىلەر تۇنگى ۋاقىتتا جۇيەلى تۇردە تىنىشتىق پەن قوعامدىق ءتارتىپتى بۇزسا, پوليتسياعا شاعىمدانۋعا بولاتىنىن ەسكەرتتى.